Ниеден британски весник не ја искористи папарацо фотографијата од принцезата од Велс, Кејт Мидлтон, поради почит кон долгогодишната конвенција да не се користат такви слики.
Сликата е направена од фотограф за новинската агенција „Бекгрид“ и беше објавена во Британија само на веб-страницата за вести за познати личности ТМЗ. Фотографијата, која е зрнеста и изгледа дека е направена со долга леќа, ја прикажува принцезата на патување со приватен автомобил, а ја вози нејзината мајка.
Новинските публикации во Обединетото Кралство (ОК) се придржуваат до Кодексот на уредниците. Во него се наведува дека е неприфатливо да се фотографираат луѓе без нивна согласност, на јавни места каде што е разумно да се почитува нивната приватност. Медиумите во САД не се придржуваат до тој кодекс бидејќи Првиот амандман (гаранција за слободата на изразување) го надминува правото на приватност.
Тоа беше прва фотографија на принцезата Кејт откако имаше операција на абдоменот на 16 јануари. Нејзиното непојавување во јавноста и штурите информации од Палатата предизвикаа бројни шпекулации на социјалните мрежи за нејзиното здравје.
– Сметам дека ниеден весник во Обединетото Кралство не ги објавува, бидејќи тие се сметаат за нарушување на приватноста и повеќе нема пазар за папарацо фотографии од кралскиот дом по смртта на Дијана, принцезата од Велс – рече Камила Томини, уредник во „Дејли телеграф“ која покрива политика и животот на кралското семејство.
