Генералниот директор на Светската здравствена организација (СЗО) Тедрос Аданом Гебрејесус изјави дека сирискиот претседател Башар ал-Асад покажал подготвеност да размисли за отворање други гранични премини за испорака на помош на жртвите од земјотресот во северозападниот дел на земјата, област која е под контрола на бунтовниците.
Гебрејесус разговараше со Асад за помошта што ќе им се обезбеди на жртвите од разорниот земјотрес на 6 февруари што ја погоди југоисточна Туркије и дел од Сирија.
– Се повеќе кризи, од конфликти, коронавирус, колера, пад на економијата, а сега и земјотрес. Сето тоа предизвика неподносливи последици – рече Гебрејесус, кој беше во Алепо во саботата.
Досега само еден граничен премин е отворен од Туркије за бунтовничките области во Сирија. Тој премин е оштетен во земјотресот и затоа се апелира за отворање и други гранични премини.
Хуманитарната помош вообичаено пристигнува во бунтовничките области преку Туркије во рамките на прекуграничниот механизам создаден во 2014 година со резолуција на Советот за безбедност на ОН.
Амбасадорката на САД во Обединетите нации Линда Томас-Гринфилд го повика Советот за безбедност на ОН да одобри 2 дополнителни пристапни пункта за испорака на помош за деловите од Сирија погодени од смртоносниот земјотрес минатата недела.
„Луѓето во погодените области сметаат на нас. Тие апелираат до нашата заедничка хуманост да помогне во нивниот момент на потреба. Не можеме да ги изневериме – мораме веднаш да гласаме за резолуција за да го послушаме повикот на ОН за овластување на дополнителни гранични премини за испорака на хуманитарна помош. Имаме моќ да дејствуваме. Време е да се движиме со итност и цел“, се вели во соопштението на Томас-Гринфилд.
