Шефот на руската служба за безбедност (ФСБ), Александар Бортников, во вторникот ги обвини Украина и Западот дека се обидуваат да ги поттикнат Русите на саботажа и вооружен бунт на позадината на офанзивата во Украина.
„Украинските безбедносни служби и нивните западни газди започнаа агресивна идеолошка кампања и кампања за регрутирање насочена кон нашите граѓани, особено помладата генерација“, рече Бортников на состанокот на рускиот антитерористички комитет.
Тој смета дека целта на оваа кампања е да ги вклучи Русите „во субверзивни, терористички и екстремистички активности“ во Русија.
Бортников е убеден дека од февруари во Русија се спречени 118 „терористички злосторства“, кои требало да ги направат „млади и адолесценти, вклучително и малолетници“.
Неговите оценки ги надополнуваат минатонеделните изјави на рускиот претседател Владимир Путин, кој ги обвини западните тајни служби дека се вмешани во „терористички“ напади во Русија.
На почетокот на март, познатиот руски воен блогер Максим Фомин, познат по својата жестока поддршка за руската офанзива против Украина, беше убиен во бомбашки напад во кафуле во Санкт Петербург.
Неколку Руси неодамна беа осудени на тешки затворски казни за палење станици на воена полиција што се користат за регрутирање војници.
Останатите беа прогласени за виновни за објавување „лажни информации“ или „дискредитација“ на армијата и беа осудени на неколку години затвор.
Од почетокот на конфликтот што го започна во февруари 2022 година, руската војска се соочи со неколку саботажи во воените бази.
