Русија синоќа повторно изврши напади со беспилотни летала врз цели во Киев и Одеса. Оштетени се главно шахти на индивидуални домаќинства и стопански објекти, нема извештаи за жртви.
Украинската престолнина Киев среде ноќ повторно беше цел на напади со руски беспилотни летала, кои предизвикаа мала материјална штета, додека нема информации за жртви. Предупредувања за воздушни напади беа пријавени и од други региони низ Украина, вклучително и Одеса, каде што руски дрон, наводно, погодил административна зграда во едно од пристаништата.
„Непријателот го нападна Киев од воздух по втор пат овој месец“, објави воената управа на главниот град на Украина на својот профил на Телеграм. Тие додадоа дека руските сили најверојатно го извршиле нападот со беспилотни летала од иранско производство од областа Краснодар, пренесува француската новинска агенција АФП.
Украинското Министерство за внатрешни работи соопшти дека пронашле остатоци од беспилотно летало во регионот на Киев. Се додава дека „оштетени се прозорците на одделни домаќинства и деловни објекти“, и дека нема извештаи за можни жртви на нападите.
Мета на ноќни напади со беспилотни летала бил и пристанишниот град Одеса на југот на Украина, објави Сергиј Брачук, претставник на тамошната воена администрација.
Подоцна, гувернерот на регионот Одеса, Олег Кипер, објави дека нападот бил насочен кон објекти за увоз на жито на едно од пристаништата во регионот. „Силите за воздушна одбрана не му дозволија на непријателот да го спроведе планот за напад на терминалот за жито во едно од пристаништата во Одеса“, рече тој.
Повеќето од беспилотните летала беа соборени
Тој објасни дека повеќето од беспилотните летала биле соборени, од кои два „погодиле во административната зграда на една од пристанишните згради“ и предизвикале пожар на два терминали во близина на пристаништето, вклучувајќи го и терминалот за жито. Според зборовите на гувернерот, пожарот е изгаснат, има поголема штета, но нема жртви.
Според украинската армија, противвоздушната одбрана соборила вкупно 26 руски беспилотни летала, наведува АФП.
Предупредувања против руски воздушни напади беа објавени и во регионите Миколаев, Керсон, Кировоград, Полтава, Суми и Харков на полноќ.
