Нобеловецот, професор и истакнат американски економист Пол Кругман, кој в понеделник ќе има обраќање на конференцијата „Одржување на растот во време на неизвесност и потоа“ на Скопје економски финансиски форум, очекува инспиративна дискусија на актуелни економски теми.
На учесниците на форумот и на економската јавност во нашата земја Кругман им се обрати преку видеопорака.
Пол Кругман се смета за еден од највлијателните економисти на денешницата. Освен по редефинирањето на теоријата за меѓународна трговија, познат е и како основач или коосновач на неколку нови дисциплини во меѓународната економија – од новата трговска теорија (NTT) и новата економска географија (NEG) до модели на финансиски кризи и движења на девизниот курс. Нобеловата награда за економија ја доби во 2008 година.
Годинешната конференција на СЕФФ ќе се одржи на 30 и 31 мај 2022 година, во хотелот „Александар Палас“ во Скопје. Четирите столба на дискусијата ќе бидат: Макроекономски предизвици во турбулентни времиња, Отпорност, конкурентност и регионална соработка, Енергија, зелена транзиција и инфраструктура и По кризата: двигатели за одржлив раст.
Покрај Кругман, меѓу потврдените учесници се повеќе други истакнати економисти, високи претставници на меѓународни финансиски институции, министри за финансии, гувернери… кои ќе ги образложат своите гледишта и ќе дебатираат на еден од осумте панели на #СЕФФ2022.
