Српскиот тенисер Новак Ѓоковиќ сепак нема да игра на Мастерсот во Индијан Велс и Мајами, што го потврди и на својот Твитер профил.
Иако вториот рекет во светот беше во ждрепката за споменатите два турнири, учество нема да има.
Причината се постојните правила во врска со коронавирусот и патувањето во САД. Го спречуваат Новак да влезе во земјава, бидејќи не е вакциниран.
До последен час се чекаше одобрението од Центарот за контрола и превенција на болести, но прописите не се сменија во корист на поранешниот број еден.
Затоа ја прескокнува американската турнеја (Индијан Велс 10,3-20,3, Мајами 21,3 – 3,4) и мора да се подготви за остатокот од сезоната.
Во овој момент не е целосно јасно на кои турнири ќе може да настапува, вклучувајќи ги и преостанатите три Гренд Слема – Ролан Гарос, Вимблдон и УС Опен.
Последен пат Новак беше на теренот во Дубаи, каде беше елиминиран во четвртфиналето од Јирџи Весели. Тој претходно не можеше да настапи на Австралија опен бидејќи не ја прими вакцината против коронавирус.
