Невремето Бора, кое ја зафати Грција и однесе животи на двајца мажи на островот Лемнос, го погоди и Родос, поради што властите го забранија сообраќајот бидејќи делови од патната мрежа на островот беа тешко оштетени.
На островот непрекинато врнело повеќе од 16 часа, што резултирало со повеќе од 300 литри на метар квадратен врнежи.
Градоначалникот на Родос Александрос Колиадис ги повика жителите заради безбедност да останат во своите домови, пишува порталот Екатимерини.
– Ситуацијата на островот е поразителна и длабоко шокантна. Жителите на Родос се потресени од она што се случи во саботата – изјави регионалниот гувернер Јоргос Хацимаркос.
Пријавени се неколку случаи во кои и спасувачите морале да бидат спасени додека се обидувале да евакуираат цивили, бидејќи тие работеле во исклучително опасни услови.
Другите штети пријавени во Родос вклучуваат урнати мостови, лизгање на земјиштето и голема штета на приватен имот.
На социјалната мрежа Фејсбук е објавено видео од грчкото одморалиште Калитеа на кое се гледа како силно невреме ја погоди Грција.
Во целата земја се најавени лоши временски услови, но велат дека најобилни врнежи ќе има на Халкидики, Иматија, Пела, Лемнос и на островот Родос.
Поради невремето затворени се многу училишта низ државата, а на граѓаните им се препорачува да не излегуваат никаде од домовите додека не помине невремето.
Обилните дождови го парализираа грчкиот остров Родос, додека другите делови на Грција исто така беа погодени од бурата Бора овој викенд. Како последица на силното невреме две лица загинаа, додека голем дел од земјата е поплавен.
Во 600 случаи, пожарникарите мораа да бидат распоредени на Родос за да ги спасат луѓето и да испумпуваат вода од поплавените куќи. Најтешка е состојбата во селата Пастида, Кремасти, Халисос и Марица.
Забраната за сообраќај е воведена бидејќи големи делови од патната мрежа на Родос се целосно уништени, а постои голема веројатност повторно да се интензивира временскиот систем и да донесе нови врнежи, објасни регионалниот претставник.
Грчката цивилна одбрана го забрани сообраќајот на Родос до понеделник. Низ поплавените подрачја се дозволени само противпожарната бригада, полицијата и итната помош.
Силните ветрови предизвикаа паѓање на дрвја во Солун, предизвикувајќи штети на продавници и автомобили.
Националната метеоролошка служба на Грција предвидува дека до понеделник ќе се задржи лошото време во повеќе делови од земјата, особено во централните и северните делови на земјата.
