Денга треската ќе стане главна закана во јужниот дел на Соединетите Американски Држави, јужна Европа и делови од Африка во оваа деценија, имајќи предвид дека повисоките температури создаваат поволни услови за комарците кои ја пренесуваат болеста, рече Џереми Фарар, специјалист за заразни болести во Светската здравствена организација (СЗО).
Фарар изјави за Ројтерс дека за денгата треба да се зборува поактивно.
– Мораме навистина да ги подготвиме земјите за тоа како ќе се справат со дополнителниот притисок што ќе дојде во иднина во многу, многу големи градови – додаде тој.
Фарар рече дека болеста најверојатно ќе стане ендемична во делови од САД, Европа и Африка, региони каде што веќе има ограничен локален пренос, бидејќи глобалното затоплување ги прави новите области поволна средина за ширење на комарците.
Тој предупреди дека тоа ќе изврши голем притисок врз болничките системи во многу земји.
Денга треската долго време мачи голем дел од Азија и Латинска Америка, предизвикувајќи околу 20.000 смртни случаи секоја година, пишува Ројтерс.
Стапките на болести веќе се зголемени за осум пати на глобално ниво од 2000 година, главно поттикнати од климатските промени, како и од зголеменото движење на луѓето и урбанизацијата.
Многу случаи не се пријавени, но 4,2 милиони случаи беа пријавени ширум светот во 2022 година, а здравствените власти предупредија дека оваа година се очекуваат рекордни нивоа на пренос.
Бангладеш моментално ја доживува својата најлоша епидемија досега, со повеќе од 1.000 смртни случаи.
Повеќето луѓе кои заболуваат од денга немаат симптоми, што значи дека бројот на случаи е далеку поголем од пријавениот.
Симптомите вклучуваат треска, грчеви во мускулите и болки во зглобовите, а во помалку од еден процент од случаите болеста резултира со смрт.
Не постои специфичен третман за денга, иако постои достапна вакцина.
Претходно оваа недела, СЗО ја препорача вакцината Куденга од Такеда Фармацеутикалс за деца на возраст од шест до 16 години, во области каде што инфекцијата е значаен здравствен проблем.
Куденга беше одобрена и од регулаторите на ЕУ, но Такеда ја повлече својата американска апликација претходно оваа година, наведувајќи ги проблемите со собирањето податоци.
Такеда рече дека сè уште преговара со американската Администрација за храна и лекови за вакцината.
Albanian
English
Macedonian
Turkish
