Најмалку 41 лице загинаа во женски затвор во Хондурас, изјави во вторникот портпаролот на тамошното јавно обвинителство, откако избија немири во затворот.Властите работат на идентификување на телата во женскиот затвор со 900 лица, на околу 20 километри од главниот град Тегусигалпа, изјави портпаролот Јуриј Мора за Ројтерс, известувајќи дека некои починале од изгореници, а други биле застрелани. Тој рече и дека Владата во моментов не може да ги потврди деталите за настанот.
Делма Ордонез, претседател на здружението за семејства на затвореници, изјави за Ројтерс дека во вторникот во раните утрински часови избила тепачка во затворот меѓу ривалските банди Барио 18 и Мара Салватруча.
Локалните медиуми објавија дека дошло до бунт, објавувајќи фотографии на кои се гледа како црн чад извира од зградата на затворот.
Роднините на затворениците во вторникот побараа информации за нивните најблиски пред затворот.
„Барам информации за тоа што се случи со ќерка ми, но сè уште не не известија“, изјави една жена за локалната телевизија.
Анонимен извор од државната болница изјави дека седум лица се лекуваат.
Има историја на смртоносни инциденти во затворите во Хондурас, а во 2018 година наводно биле убиени 18 затвореници во конфликт на банди, а повеќе од 350 луѓе загинале во пожар во 2012 година, пренесува Ројтерс.
