Вкупната тежина на копнените цицачи кои живеат во дивината – од слонови и бизони до елени и тигри – денес е помалку од 10 отсто од вкупната тежина на сите мажи, жени и деца кои живеат на нашата планета, пишува Гардијан.
Студијата на израелскиот институт за наука Вајцман заклучува дека денешните диви копнени цицачи сочинуваат вкупна маса од 22 милиони тони.
За споредба, човечката популација денес тежи околу 390 милиони тони.
Видовите што ги припитомивме, како што се овците и говедата, додаваат уште 630 милиони тони вкупна маса на суштествата кои се „натпреваруваат“ со цицачите во дивината за ресурсите на Земјата.
Само биомасата на свињите, на пример, е речиси двојно поголема од вкупната биомаса на дивите копнени цицачи.
Бројките јасно покажуваат дека човечкото претворање на дивината и природните живеалишта во огромни глобални насади има катастрофални последици за дивиот свет.
Романтичната идеја дека Земјата е планета која сè уште е покриена со огромни рамнини и џунгли полни со диви животни е во спротивност со реалноста, истакнуваат авторите на студијата.
Документарците не ја прикажуваат реалноста
Како што човечката популација на Земјата се приближува до бројката од речиси осум милијарди, природниот свет и дивиот свет постепено исчезнуваат.
„Кога гледате документарци за дивиот свет на телевизија, лесно може да претпоставите дека цицачите се добро во дивината“, вели водечкиот автор на студијата Рон Мајло.
Но, вели тој, таа претпоставка е погрешна.
„Напротив, не им оди толку добро. Нивната вкупна маса е околу 22 милиони тони, што е помалку од 10 проценти од вкупната маса на човештвото. А кога на тоа ќе ги додадеме сите наши говеда, овци и други добиток, тоа е уште 630 милиони тони или 30 пати повеќе од вкупната маса на диви животни. Податоците се поразителни и се повик за будење на човештвото“, објасни Мило.
Студијата под наслов „Глобална биомаса на дивите цицачи“ објавена во американското списание Proceedings of the National Academy of Sciences, исто така, открива дека оние кои најдобро поминуваат – како што се белоопашите во САД и дивата свиња – се исто така оние кои полесно се прилагодуваат до присуство на луѓе.
Двата вида можат да се најдат во близина на населбите, а повремено се третираат како домашни миленици.
„Дури и во дивината, отпечатокот на хуманоста е очигледен“, додаде Мило.
Мачките тежат колку африканските слонови
Научниците утврдиле дека вообичаените видови на домашни миленици укажуваат и на колкаво влијание имаат луѓето на планетата на која сите живееме.
Кучињата имаат вкупна маса од околу 20 милиони тони, бројка блиска до комбинираната биомаса на сите диви копнени цицачи, додека мачките имаат вкупна биомаса од околу два милиони тони, речиси двојно поголема од онаа на африканскиот слон.
„Овие споредби на масата на припитомени и диви животни укажуваат на голема и активна улога на луѓето во изобилството на цицачи на Земјата“, наведуваат истражувачите во нивниот труд.
Студиите за биомаса не се единствениот начин за квантифицирање на животинскиот свет. И бројот на животински видови е од големо значење. И тој е исто така во пад.
„Биомасата е комплементарна со богатството на видовите и другите показатели за различноста и може да послужи како показател за изобилството на диви цицачи и нивниот еколошки отпечаток на глобално ниво“, заклучуваат истражувачите.
