На социјалната мрежа Тик-Ток, по ликвидацијата на Фатон Хајризи, осомничениот за убиството на граничниот полицаец Никола Крсмановиќ во Лозница, сѐ повеќе се појавуваат објави во кои корисниците го величаат Хајризи, објави српски Телеграф.
Фатон Хајризи беше осуден бидејќи убил руски војник, припадник на КФОР, во Косово и Метохија, така што му го украл оружјето, а потоа го застрелал. Тој девет пати бегал од затвор, последен пат на 6 јули. Откако српската полиција го ликвидираше поради отпор при апсењето, на Тик-Ток се појавија голем број профили со неговото име, негови фотографии и сп видеа.
Објавите содржат и извадоци од интервјуа, а во едно од нив наводно рекол дека „грабнал калашников и веднаш убил руски војник на плоштадот Адем Јашари“. Хајризи во интервјуата изјави и дека жали што убил руски војник, но во ниеден момент не спомнал дека се кае за загубата на животот, туку зборува за тоа како му била уништена младоста бидејќи ја поминал во затвор, „а бил интелигентен и добар на училиште“.
Еден корисник на Тик-Ток објави две фотографии од Хајризи, од кои едната алудира на убиството на припадник на КФОР и натпис „првиот пат беше толку убаво“, а потоа беше споделена фотографија од Хајризи и од убиениот полицаец Никола Крсмановиќ, со наслов „Морав да го сторам тоа двапати“.
Глорификацијата на убиецот на полицаецот не застана тука, со оглед на тоа што корисниците на споменатата социјална мрежа споделуваат фотографии од убиениот полицаец со зборовите: „Јас сум Барби“, додека до фотографиите на Хајризи се појавуваат зборовите „Воена глава“. Тие исто така додадоа слики од лавови на фотографиите на Хајризи.
Некои отидоа чекор понатаму и на раката го истетовираа името на Фатон Хајризи. Еден маж го истетовирал името на Хајризи со натписот УЧК, додека друг под името на Хајризи го истетовирал „чист убиец“, што е име за убиство извршено со пукање во глава.
Не само што Хајризи масовно е величан на Тик-Ток, туку и во коментарите го навредуваат убиениот полицаец, неговото семејство, се смеат и уживаат во она што се случи. Додека едни изразуваат сочувство до семејството на Хајризи, други тврдат дека Хајризи не е убиен.
За потсетување, Фатон Хајризи застрела двајца припадници на граничната полиција кога таксито во кое се наоѓал било запрено за рутинска контрола на влезот во Лозница. Го убил Никола Крсмановиќ (34), а го ранил Вјекослав Илиќ (50), по што побегнал.
Два дена подоцна бил пронајден во напуштена фабрика во близина на Лозница. Додека тој давал отпор при апсењето и пукал во полицијата, полицијата го неутрализирала.
