Потребна е масовна излезност на 8 мај за да ги пратиме во опозиција ДУИ кои ја ограбуваат и ја ставаат Македонија на колена, порача лидерот на ВМРО-ДПМНЕ, Христијан Мицкоски на денешниот митинг во Росоман.
– Овој резултат од 24 април е и одговорност. Сè што зборуваме треба и да примениме. Народот очекува и убеден сум дека во овие нешто повеќе од 10 дена народот ќе се приклучи, народот е обединет и сака промени и брзи резултати- рече Мицкоски.
Претседателот на ВМРО-ДПМНЕ информираше дека како коалиција внимателно е пристапено во креирање на програмата.
-Внимаваме што ќе ветуваме, не сакаме да ветуваме нешто што не може да се реализира, не сакаме народот да ја губи надежта. Си дадовме збор дека програмата ќе ја ревидираме за две години. Нема скандал за повеќе од две години во работата на градоначалниците. Затоа можам да кажам дека поучени од ова искуство имајќи предвид дека најголем дел од проектите се веќе реализирани, одлучивме по две години да направиме ревизија и на оваа програма. Сметаме дека можеме повеќе, ама не сакаме да ве разочараме – истакна Мицкоски.
Лидерот на ВМРО-ДПМНЕ порача дека сега треба максимална мобилизација бидејќи како што рече „нема да остават да биде едноставно, мора да добиеме мнозинство во парламентот, да имаме наш претседател и заедно со градоначалниците да направиме трансформација на Македонија”.
Според него за ова треба масовност.
-Има центри на моќ кои не сакаат да ја видат успешна Македонија, имаме такви и тие беа клучен фактор до сега, беа и во Владата, и тука мислам на ДУИ и Али Ахмети. Тој сака да ја види осиромашена Македонија. Тие не сакаат да ја видат успешна Македонија – рече Мицкоски.
Мицкоски укажа дека овие избори се шанса криминалците да заминат во опозиција.
– И ова го зборувам само поради криминалот, не го зборувам за ДУИ затоа што се Албанци. Не, туку поради криминалот. Јас ја повикав опозицијата кај Албанците да се бориме заедно. Јас се борам против ДУИ кои ја ограбуваат и на колена ја ставаат Македонија – заклучи Мицкоски.
