Златан Ибрахимовиќ поради повреда нема да игра до крајот на сезоната. Веројатно поради повредата на листот ќе заврши импресивната кариера на 41-годишниот напаѓач.
Договорот меѓу Ибрахимовиќ и Милан истекува на крајот од сезоната. Извесно е дека клубот нема да му понуди продолжување на соработката.
„Ибрахимовиќ е целосно уништен по уште една повреда, можеби ќе треба да паузира до крајот на сезоната. Тој стравува дека нова повреда може да му ја заврши кариерата, бидејќи сака да продолжи да игра за Милан. Сепак, челниците на Милан не размислуваат за продолжување на договорот со Швеѓанецот, бидејќи решија да бараат помлад напаѓач“, пишува италијанскиот весник „Газета дела Спорт“.
Ибрахимовиќ се повреди неодамна на загревањето во текот на натпреварот против Лече (2:0). Легендарниот шведски фудбалер го пропушти поголемиот дел од сезоната поради операција на коленото. Се обидуваше да се врати на теренот, одигра неколку натпревари, но беше очигледно дека годините го стигнаа.
Севкупно, брилијантниот играч оваа сезона одигра 143 минути во дресот на Росонерите и постигна гол против Удинезе. Тој може да биде неговиот последен во тимот на Милан, но и во кариерата.
Ибрахимовиќ се врати во Милан во 2020 година, но поради проблеми со повреди одигра само 78 натпревари и постигна 37 голови. Минатата сезона со Милан ја освои титулата во Серија А.
