Илон Маск најави дополнителни промени во неговата социјална мрежа X кои ќе овозможат одредени кориснички сметки да добијат премиум функции бесплатно.
Во објава на платформата Х порано позната како Твитер, Маск рече дека сите сметки со повеќе од 2.500 проверени следбеници ќе можат да пристапат до функции кои вообичаено чинат 8 долари месечно.
Премиум функциите вклучуваат можност за уредување и пишување подолги објави, како и намалување на бројот на реклами што корисникот ги гледа. Исто така, на сопственикот на сметката му дава сина ознака за проверка до неговото име.
Сопственикот на Tesla, кој го купи Twitter за 44 милијарди долари во октомври 2022 година, додаде дека оние со 5.000 или повеќе проверени следбеници, исто така, ќе добијат бесплатен пристап до функциите Premium+ на X.
Премиум и Премиум+ – од кои второто чини 16 долари месечно – им овозможуваат на корисниците пристап до Грок, модел на вештачка интелигенција што треба да „одговори речиси на сè“, според неговата веб-страница.
Објавата на Маск доаѓа откако компанијата ги демантираше извештаите дека бројот на луѓе што се пријавиле за X е намален откако тој ја презеде компанијата.
Бројот на дневни корисници на мобилната апликација на X падна на 174 милиони во февруари, што е за 15% помалку од минатата година, според истражувањето на компанијата за обработка на податоци Sensor Tower.
Сопствените податоци на X исто така укажуваат на пад на бројот на корисници од ноември 2022 година, според британскиот Sky News.
Компанијата порано позната како Твитер претходно овој месец соопшти дека има 250 милиони дневни активни корисници – помалку од 258 милиони што Маск ги тврдеше околу времето кога ја презеде компанијата.
