Бурното преземање на Твитер од страна на Илон Маск продолжи да создава превирања во четвртокот, по оставките на првите луѓе на социјалната мрежа и реткото предупредување од американската антимонополска агенција (FTC).
-„Со голема загриженост ги следиме најновите настани на Твитер. Ниту еден извршен директор или компанија не е над законот“, рече портпаролот на FTC.
Тој потсети дека платформата мора да биде во согласност со одредени правила според условите на договорот потпишан со агенцијата за безбедност и доверливост на податоците.
Тој договор, изменет оваа година, „ни дава нови алатки за да се увериме дека се почитуваат и ние сме подготвени да ги користиме“, додаде портпаролот, мислејќи на казната што може да ја наложи FTC.
Сопственикот на Tesla и SpaceX пред една недела отпушти половина од 7.500 работници на калифорниската компанија, десет дена откако го презеде и стана нејзин единствен извршен директор.
Стотици луѓе заминаа летово, а оставките на раководството на компанијата продолжија минатата недела.
„Вашингтон пост“ пишува дека неколку директори си заминале, вклучувајќи ги и раководителите за приватност и усогласеност на податоците.
Илон Маск загрижува многу влади, огласувачи, организации за заштита на малцинствата и корисници.
Тој постојано се обидуваше да ги увери сите, забележувајќи дека умереноста на содржината, заштитата од злоупотреба на платформата, не е променета.
Но, одлуките што тој ги донесува набрзина и неговите провокации на Твитер, веќе две недели предизвикуваат контроверзии.
