Мрежата на академска солидарност и ангажман (МАНУ) ја осуди реториката на премиерката Ана Брнабиќ во српскиот парламент и таргетирањето на универзитетските професори кои не се согласуваат со владата.
По навредливите зборови упатени кон еден пратеник или кон сите пратеници на опозицијата, за кои не најде за прикладно јавно да се извини, премиерката овојпат за своја цел го избра најголемиот српски универзитет, се вели во соопштението.
Со овој чин само продолжи ловот на професори дисиденти кои не се колебаат јавно да ја критикуваат извршната власт, посочуваат од МАНУ.
Од друга страна, се додава, кога станува збор за професори со истомисленици, со изјавата „не чепкајте ги политичките аналитичари, бидејќи нивната работа е да кажат што мислат и да ја анализираат работата на политичарите“, Брнабиќ всушност сугерира дека на професорите им е дозволено јавно да ги искажуваат своите мислења само кога тие се искажани во корист на владата.
Затоа, како членови на академската заедница, јавно ја прашуваме премиерката дали смета дека на професорите на Универзитетот во Белград им е дозволено да кажат што мислат само во улога на политички аналитичари и само кога тоа е во интерес на Владата, и дали според неа Универзитетот треба јавно да го осуди секој што размислува поинаку и да ги критикува властите, праша МАНУ.
Во соопштението, МАНУ го осудува секој повик на насилство, од која било страна, но исто така смета дека одговорноста за политичката атмосфера во општеството е пред се на оние кои го водат тоа општество и дека мора да се преземе лична и политичка одговорност пред да се повикаат другите општествени чинители на сметка..
