Францускиот претседател Емануел Макрон денеска изјави дека церемонијата на отворање на Олимписките игри во Париз, планирани да се одржат на реката Сена на крајот на јули, би можела да биде преместена на стадионот „Стад де Франс“ доколку се оцени дека безбедносната закана е превисока.
Зборувајќи за француската телевизија BFM-TV и радио станицата RMC, Макрон рече дека француските безбедносни сили ќе бидат мобилизирани „на извонредно ниво“ за да се осигура безбедноста на настанот на отворено.
„Ако оцениме дека ризиците се превисоки, имаме резервни сценарија“, рече тој. За да се ограничи безбедносната закана, организаторите би можеле да одлучат да ја скратат парадата на учесниците на Олимписките игри и „дури да го преместат целиот настан на Стад де Франс“, додаде лидерот на Франција.
Церемонијата на отворањето на Олимпијадата во Париз, закажана за 26 јули, треба да биде првата досега одржана надвор од стадион. Според сценариото, околу 10.500 спортисти ќе продефилираат со чамци долж Сена по патека долга шест километри.
Организаторите првично планираа грандиозна церемонија на отворање за околу 600.000 луѓе, од кои повеќето ќе ја следат акцијата бесплатно од брегот на Сена. Но, безбедносните и логистичките проблеми ја наведоа владата постепено да ги намалува своите планови, па на почетокот на оваа година вкупниот број на гледачи се намали на околу 300.000.
