Францускиот претседател Емануел Макрон одби да го употреби зборот геноцид за руските воени акции во Украина, јавува Си-Ен-Ен.
Во телевизиското обраќање до Франс 2, Макрон рече дека ќе биде внимателен кога го користи терминот бидејќи Русите и Украинците се братски народи.
„Сакам да продолжам да се обидувам, колку што можам, да ја прекинам војната и да го вратам мирот. „Не сум сигурен дека заострувањето на реториката ќе придонесе за тоа“, рече Макрон.
„Она што со сигурност може да се каже е дека ситуацијата е неприфатлива и дека се работи за воени злосторства. Се соочуваме со невидени воени злосторства на нашата почва, на тлото на Европа“, истакна францускиот претседател.
Макрон, кој е во трката за реизбор за претседател на Франција, исто така посочи дека соработката меѓу неговата земја и Украина продолжува за истражување на наводните воени злосторства.
Тој нагласи дека Русија еднострано започна екстремна, брутална војна, дека е утврдено дека руската армија извршила воени злосторства и дека нивните сторители сега мора да се откријат.
Потсетуваме, американскиот претседател Џозеф Бајден денеска за прв пат изјави дека Владимир Путин извршил „геноцид“ во Украина.
