Машка младинска ракометна репрезентација на Македонија го заврши настапот на Европското првенство за играчи до 20 години во Словенија на 9 место. Во последниот натпревар за пласман, избраниците на селекторот Раде Стојановиќ направија вистински подвиг и успеаја да ја победат ракометна велесила Франција со 30-29.
Јунак на натпреварот беше голманот Иван Галевски, кој одбрани пенал во последната секунда и спречи продолженија.
Најефикасни во нашиот табор беа Дамјан Субашевски и Дамјан Митев со по 6 погодоци, а зад нив беа Димитар Узунчев со 5 гола и Мирче Калајџиески, кој постигна еден погодок помалку.
Младите македонски ракометари на ова Европско првенство имаат само еден пораз во 8 одиграни натпревари. Загубија токму од Франција во претходната фаза од ЕП (У20) со 18-25, одиграа нерешено со Храватска и со Австрија и запишаа 5 победи во преостанатите мечеви.
