Белорускиот претседател Александар Лукашенко денеска телефонски разговарал со рускиот претседател Владимир Путин за безбедносни прашања и спречување на ескалација на украинскиот конфликт, јави информативниот канал на Телеграм „Пул Первого“, кој е близок до прес-службата на шефот на белоруската држава.
„Фокусот на лидерите на двете земји беше на безбедносните прашања и спречувањето на ескалација на украинскиот конфликт“, се вели во објавата.
Се додава дека за време на дискусијата за меѓународната агенда, Лукашенко и Путин разговарале за прашањата на претстојниот состанок на Шангајската организација за соработка во јули во Астана, а договориле и да се сретнат на маргините на самитот.
Се разговарало и за деталите и прашањата за претстојната посета на претседателот на Белорусија на Монголија и регионот Иркутск која ќе се реализира од 1 до 4 јуни.
