Лидерите на Западен Балкан во четврток во Берлин ќе потпишат три договори за слобода на движење со лична карта, за признавање на високообразовните квалификации и за признавање на професионални квалификации на лекари, стоматолози и архитекти.
Шефовите на владите на Србија, Косово, Црна Гора, Северна Македонија, Албанија и Босна и Херцеговина ќе потпишат регионални договори на самитот за Западен Балкан како дел од Берлинскиот процес.
Трите договори беа одобрени од министрите за надворешни работи на шесторката од Западен Балкан на состанокот организиран од германската влада на 21 октомври.
Самитот ќе го отвори германскиот канцелар Олаф Шолц, а главни теми на разговор ќе бидат иднината на Берлинскиот процес и Заедничкиот регионален пазар, како и енергетската безбедност и транзицијата.
По работните сесии ќе следи потпишување на три договори, а потоа ќе има средби со претставници на Форумот на млади и граѓанско општество.
На крајот на самитот, заедничка прес-конференција ќе одржат германската канцеларка, премиерот на земјата која ќе биде домаќин на следниот самит на Берлинскиот процес и претседателката на Европската комисија, Урсула фон дер Лајен.
Берлинскиот процес е формат на годишни состаноци што германската влада, под канцеларката Ангела Меркел, ги иницираше во 2014 година кога во Берлин се одржа Конференцијата за Западен Балкан.
По тој самит во Берлин, домаќини беа Виена во 2015 година, Париз во 2016 година, Трст во 2017 година, Лондон во 2018 година, Познан во 2019 година и Софија во 2020 година.
Целта на процесот е да се забрза соработката на шесте земји од Западен Балкан и интеграцијата на тој регион во ЕУ. Иницијативата главно се фокусира на решавање на билатералните и внатрешните проблеми во регионот и подобрување на економската соработка, која би била основа за одржлив развој на регионот.
