Повеќето луѓе претпоставуваат дека лекарите имаат совршени навики во исхраната. Но, деновите им се всушност напорни, работат долги смени и понекогаш немаат време да седнат да изедат квалитетен и комплетен оброк.
За да ги избегнат автоматите кои се полни со грицки и готови сендвичи, тие обично носат со себе храна која ќе обезбеди да останат здрави, сити и полни со енергија и дека можат да јадат од нозе. Лекарите од итната медицинска помош открија за CNBC која е таа храна.
Јаткасти плодови
Јаткастите плодови се богати со протеини и се поеколошки од месото. Но, тие треба да се јадат умерено бидејќи содржат калории и заситени масти. Премногу заситени масти може да го подигне ЛДЛ холестеролот, што придонесува за срцеви заболувања и мозочен удар.
„Избегнуваме пржени, солени и захаросани јаткасти плодови кои содржат повеќе масло, сол или шеќер отколку што му треба на нашето тело“, велат д-р Адаира Ландри и Реса Е. Луис.
Хумус
Наутот е главната состојка на хумусот, а богат е со влакна и е одличен извор на растителни протеини. Хумусот содржи незаситени масти, кои го зголемуваат нивото на здрав ХДЛ холестерол. Истражувањата покажаа дека додавањето хумус во вашата исхрана може да помогне да се заштитите од срцеви заболувања, дијабетес тип 2 и одредени видови на рак.
Зеленчук
Како што пренесува Индекс, лекарите често грицкаат моркови, целер и парчиња брокула или карфиол на работа. Печен сладок компир е исто така одлична опција.
Авокадо
Авокадото содржи неколку клучни хранливи материи, вклучувајќи каротеноиди, мононезаситени масти, калиум и влакна кои се поврзани со намален ризик од хронични болести.
Маслинки
Маслинките се богати со олеат, кој е мононезаситена масна киселина. Студија од 2016 година покажа дека јадењето повеќе мононезаситени масти го намалува ризикот од прерана смрт.
Маслинките често се натопени во саламура, а грицките со висока содржина на сол може да доведат до висок крвен притисок со текот на времето. Но, во умерени количини, тие се забавно и брзо решение за болките од глад.
Морски алги
Јадливите алги се хранливи, нискокалорични и богати со растителни влакна.
Тврдо варени јајца
Јајцата се полни со посни протеини. Можете да зготвите неколку од нив одеднаш и да ги чувате во фрижидер и да ги јадете во текот на неделата.
Ако сте како лекар и секогаш сте во движење, најдобриот совет е да јадете храна која е вкусна и не одзема многу време за подготовка.
