Мировниот план на украинскиот претседател Владимир Зеленски за прекин на конфликтот со Москва е нереален и не може да послужи како основа за какви било идни разговори, тврди рускиот министер за надворешни работи Сергеј Лавров.
Зборувајќи во вторникот заедно со неговиот кинески колега Ванг Ји, Лавров рече дека Пекинг и Москва се согласуваат дека сите преговори мора да ги земат предвид безбедносните грижи на Русија.
Првпат претставена во есента 2022 година, мировната формула на Зеленски од десет точки повикува на целосно и безусловно повлекување на руските сили од сите територии во границите на Украина во 1991 година. Планот предвидува и создавање меѓународен трибунал за руските воени команданти и политичкото раководство, како и репарации.
Кремљ ја изрази својата подготвеност да се вклучи во мировни преговори со Украина, но само доколку Киев и неговите западни поддржувачи ја прифатат „реалноста на теренот“.
По разговорите со Ванг во Пекинг во вторникот, Лавров рече дека Кина и Русија се на иста страна во врска со „потребата да се земат предвид легитимните грижи на сите инволвирани страни, пред сè во безбедносната сфера“.
– Во овој контекст, ние, заедно со нашите кинески колеги, го повторивме заклучокот за залудноста на какви било меѓународни настани кои не само што не ја земаат предвид позицијата на Русија, туку и целосно ја игнорираат – нагласи рускиот дипломат.
Лавров ја опиша мировната формула на Зеленски како „апсолутно шуплив“ ултиматум кој е „разведен од реалноста“.
Рускиот функционер, исто така, се заблагодари на Кина за нејзиниот балансиран став и подготвеност да одигра конструктивна улога во ставањето крај на украинскиот конфликт.
Минатата недела Лавров ја поздрави мировната иницијатива од 12 точки којашто Кина ја предложи во февруари 2023 година како „најјасна“ и најостварлива до сега, велејќи дека таа е „заснована на анализа на причините за актуелните настани и (се обидува) да ги елиминира (нивните) основни причини“.
Планот на Кина повикува на прекин на непријателствата во Украина, продолжување на мировните преговори, напуштање на „менталитетот на Студената војна“ и почитување на суверенитетот на сите нации.
Во март, портпаролот на Кремљ, Дмитриј Песков, изјави за РИА Новости дека Украина треба да прифати дека „геополитичката реалност драматично се променила од почетокот на специјалната воена операција. Границите и на Украина и на Руската Федерација се сменија“.
Песков во својата изјава мислеше на референдумите одржани од Москва во окупираните региони Доњецк, Луганск, Херсон и Запорожје во есента 2022 година, избори на кои мнозинство локални жители гласаа за приклучување кон Русија.
