Кина би можела да организира мировна конференција на која ќе учествуваат Русија и Украина, ја цитира агенцијата РИА изјавата на рускиот министер за надворешни работи, Сергеј Лавров. Лавров рече дека таквиот потег ќе биде продолжение на напорите на Пекинг за решавање на украинската криза.
– Го делиме ставот на Кина дека првенствено треба да се справиме со основните причини за конфликтот и да ги заштитиме правните интереси на сите страни, со последователни договори засновани на принципот на еднаква и неделива безбедност. Да нагласам уште еднаш, тоа подразбира почитување на реалноста на теренот, која ја одразува волјата на луѓето кои живеат таму – рече Лавров во изјавата за РИА.
Русија постојано повикува на преговори под услов Киев и Западот да ги признаат нејзините територијални придобивки во Украина. Киев ги отфрли тие предлози. Лавров ги критикуваше САД дека и помагаат на Украина, велејќи дека Вашингтон стана „учесник во злосторствата на режимот во Киев“.
Тој исто така рече дека Русија ја смета планираната испорака на борбени авиони Ф-16 со нуклеарно вооружување на Украина, за „сигнална акција“ на НАТО.
– Тие се обидуваат да ни кажат дека САД и НАТО нема да запрат пред ништо во Украина – рече Лавров.
Рускиот министер за надворешни работи потсети на катастрофалните последици од понатамошна нуклеарна ескалација.
– Сепак, се надеваме дека тековните руско-белоруски вежби за употреба на нестратегиско нуклеарно оружје малку ќе ги просветлат нашите противници и ќе ги потсетат на катастрофалните последици од понатамошната нуклеарна ескалација. На Блискиот Исток, САД исто така го разгоруваат пламенот на конфликтот – посочи Лавров.
