Со измените на Законот за матична евиденција ги решивме животните прашања на околу 526 човечки судбини, за кои досега е извршен упис во Матичната книга на родените на 409 лица, а другите 117 лица ќе бидат впишани до крајот на годината – изјави премиерот Димитар Ковачевски, кој присуствуваше на доделувањето изводи на лица кои досега не биле евидентирани во Матичната книга на родените.– Овие наши граѓани немаа документи за идентификација, не можеа да се лекуваат, ниту да се вработат, не можеа да склучат брак, ниту пак да го регулираат статусот на нивните деца. Едноставно ги немаше во системот на државата. Овие проблеми се веќе минато. Со измените на Законот за матична евиденција ги решивме животните прашања на многу наши граѓани – рече премиерот.
На настанот присуствуваа и министерот на правда Кренар Лога, директорот на Управата за водење на матични книги Емир Сулејмани и претседателка на Комисијата за политички систем и односи меѓу заедниците Соња Мираковска.
