„Ќе го следиме големото распоредување српски војници долж границата со Косово. Ја повикуваме Србија да ги повлече своите сили од границата и да продолжи да ги намалува тензиите“, изјави денеска координаторот за стратешки комуникации на Советот за национална безбедност на САД Џон Кирби, пренесува регионалниот сервис на Радио Слободна Европа (РСЕ).
Одговарајќи на новинарски прашања во Вашингтон тој рече дека во моментот не може да каже кои се целите за ваквото распоредување на воените трупи.
Српскиот претседател Александар Вучиќ претходно денеска изјави дека во долгиот и тежок телефонски разговор што го имал со американскиот државен секретар Ентони Блинкен негирал дека борбената готовност на Армијата на Србија е подигната на највисок степен и дека тој не потпишал такво нешто.
На прашање дали САД знаат дали Србија и Русија се вмешани во нападот на Бањска и за можноста за воведување санкции кон Белград високиот американски функционер одговорил:
„Истрагите продолжуваат и сакаме Србија да учествува во нив“.
Кирби нагласил дека нападот имал „високо ниво на софистицираност“. Тој рекол дека „вознемирува“ видот на оружје пронајдено по инцидентот во Бањска, кое е воено и кое вклучува и фрлачи на гранати и друго оружје.
Кирби рекол дека насилните инциденти, како оној во мај против припадниците на КФОР, како и оној во Бањска, претставуваат опасност не само за безбедносниот персонал на Косово, туку и за НАТО.
– Овој вознемирувачки циклус на насилство се влоши – рекол Кирби.
Високиот американски функционер рекол дека американскиот државен секретар Ентони Блинкен во разговорот што претходно денеска го имал со српскиот претседател Александар Вучиќ побарал Србија да ги намали тензиите.
Инаку, дека имал телефонски разговорот со Блинкен денеска информираше и српскиот претседател. Тој рече дека разговорот по повод најновата ситуација на Косово траел долго и не бил лесен и имало работи за кои се согласиле, но и такви за кои не се согласувиле.
