Кина во вторникот испрати нов екипаж во својата вселенска станица Тиангонг (Небесна палата) од вселенскиот центар Џиукван, кој се наоѓа во северозападниот дел на пустината Гоби.
Ракетата Long March 2F, долга 60 метри и тешка 40 тони, носеше екипаж од тројца во вселенското летало „Шенжу 19“, што значи „магичен брод“.
Според Кинеската вселенска агенција, командантот Каи Сухе (48), инженерот Ванг Хаозе (34) и поранешниот воен пилот Сонг Лингдонг (34) треба да се приклучат на вселенската станица околу шест и пол часа по влегувањето во вселената.
За време на својот шестмесечен престој во вселената, екипажот ќе спроведе 86 научни и технички експерименти, ќе изврши вселенски прошетки и ќе инсталира заштитни мерки за вселенски отпад на Тиангонг.
Екипажот Shenzhou 19 ќе замени тројца членови на мисијата Shenzhou 18, кои работат на вселенската станица од април. Нивното враќање на Земјата е закажано за 4 ноември.
