Во Источното Кинеско Море започнаа воени вежби на кинеската и руската морнарица. Во вежбата ќе учествуваат неколку авиони и хеликоптери, како и подморници и бродови.
Кина и Русија во средата започнаа заеднички воени вежби во Источното Кинеско Море, кои се очекува да траат до следниот вторник, објавија кинеските медиуми и странските новински агенции. Маневрите се одржуваат во близина на брегот во близина на градот Тајџоу во провинцијата Жеџијанг во источна Кина, на околу 500 километри северно од Тајван.
Офицер на кинеската морнарица рече дека вежбите ќе вклучуваат различни операции како блокада на областа, воздушна одбрана, пребарување и спасување и напади против подморници. Тој додаде дека овогодинешните вежби ќе опфатат реални борбени сценарија и нови методи на обука, кои се очекува дополнително да ја развијат соработката и комуникацијата меѓу двете морнарици.
Во вежбите се очекува да учествуваат пет бродови на кинеската морнарица, неколку подморници, авиони и хеликоптери, јавуваат кинеските медиуми. На руска страна учествуваат пет воени бродови.
Претходно оваа недела, кинеското Министерство за одбрана во соопштение рече дека заедничките вежби имаат за цел да ја покажат решителноста и способноста на двете страни заеднички да одговорат на заканите по поморската безбедност и да го одржат меѓународниот и регионалниот мир и стабилност.
