Министерот за економија Крешник Бектеши нема да прифати цена на струјата од Бугарија повисока од онаа на која Европската унија планира да ја замрзне цената. Тој рече дека земјава ќе направи договор со Бугарија и со другите земји за цена на струјата кои нема да им штетат на граѓаните
Бектеши најави дека утре ќе има нова средба на комисиите на која ќе присуствува и тој и очекува договор.
– Кој е тој што ќе плати струја повисока од онаа на која планира Европската унија да ја замрзне. Ние ги следиме случувањата и знаеме дека ЕУ планира да ја замрзне цената на струјата на 180 евра за мегаватчас. Бугарија е земја членка на Унијата и треба да се придржува на оваа одлука – рече Бектеши по средбата со поглаварот на ИВЗ реисот Шаќир Фетаху.
Бектеши рече дека не се точни цените, ниту процентите кои се лиферувани во медиумите , бидејќи земјава бара многу пониска цена од тоа.
Тој рече дека по враќањето на премиерот од САД ќе бидат објевени договорите направени со Србија и Албанија, а веќе наредните денови ќе има средби и во Туркије каде што исто така ќе се разговара за снабдување со струја и гас.
Бектеши е оптимист за изнаоѓање договор со Бугарија во врска со цената на струја.
– Во разговорите што ги имав со премиерот Ковачевски, со претседателот Радев, и со премиерот Донев и со мојот колега Христов и гледам добра волја за да имаме договор што ќе биде во корист на двете земји. Тука зборуваме за технички работи, зборуваме за да се справуваме заеднички со енергетската криза, посебно во делот на грејната сезона и политикантството е оставено на страна, изјави Бектеши, изразувајќи уверување дека со Бугарија ќе биде постигнат договор.
Тој рече дека вчера во медиумите се појавиле неколку наслови во врска со ова прашање, кои како што рече, сите од нив се невистинити.
– Северна Македонија и јас како преговарач и другите секако дека никогаш не побарале да платат електрична енергија по цена на берзата заради тоа што тоа и сега го имаме. Веќе имаме договор со Грција, со Бугарија, со Србија и со Косово да нема застој во делот на пограничните капацитети што значи дека берзите се отворени и такви шпекулации во однос на тоа дека ќе има намалување за 15, 20, 30 отсто од берзанската цена се невистини. Разговарав со Стопанската комора, ние ги знаеме нивните очекувања и преговорите ги водиме согласно очекувањата на компаниите што се на слободен пазар и во делот на количините и во делот на цената. Што се однесува на тоа што е проблемот и зошто досега немаме договор со Бугарија веќе се најавени одредени мерки од страна на Европската комисија, што треба да ги реализира и Бугарија како членка на ЕУ. Чекаме кои ќе бидат мерките усогласени целосно со Европската комисија, со цел нашиот потенцијален договор да не се коси со такви мерки – рече Бектеши.
Тој ѝ порача на опозицијата да не лиферува со бројки затоа што, како што нагласи, тука преговараат држава со држава, со цел да не упадне во преговорите заради тоа што Еврокомисијата веќе најави дека може да има замрзнување на цената на електрична енергија од 180 евра, а тие излегуваат со бројки од 400 евра.
– Кој би потпишал договор од страна на Владата кога самата Европска комисија може да донесе одлука за замрзнување на цената на електрична енергија од 180 евра. Да не се креира ниту паника во општеството, ниту да се даваат погрешни информации. Многу далеку се пониски цените што ги бараме ние и тоа што е пренесено во јавноста. Ако се донесе да нема поголема цена од 180 евра во наредниот период во делот на електрична енергија во рамки на ЕУ, како може цената да биде 400 евра која би можеле ние да ја договараме. Тоа е вон логика. Имаше такви најави претходната недела, имаше такви предлози од страна на Фон дер Лајен и секако ние ги следиме тие случувања и ќе бидеме дел на тие мерки што ќе ги носи Европската комисија. Тоа е многу важно да се наведе, а дополнително на тоа ние ги знаеме очекувањата на нашето стопанство што е на слободен пазар – рече Бектеши.
На 5 септември премиерите на Северна Македонија и Бугарија, Димитар Ковачевски и Галаб Донев се договорија да бидат извезени околу 200 мегават часови електрична енергија од Бугарија во Северна Македонија.
