Капсулата Орион на американската вселенска мисија без екипаж Артемис 1 до Месечината ја напушти лунарната орбита и е на пат назад кон Земјата, објави во четвртокот американската вселенска агенција НАСА.
Леталото прелета 64.000 километри над Месечината. Поради должината на орбитата, на капсулата и требаше една недела да патува на половина пат околу Месечината, по што повторно ја напушти орбитата на Месечината и почна да се враќа на Земјата.
Планираното спуштање на Орион во Тихиот Океан е на 11 декември.
За време на летот, Орион беше на најголема оддалеченост од Земјата од кое било вселенско летало дизајнирано за летот на астронаутите. Беше оддалечено околу 432.000 километри од Земјата.
Новата вселенска програма на НАСА „Артемис“ конечно започна, по бројни одложувања, минатата недела со лансирањето на вселенското летало Орион.
Целта на програмата е повторно слетување на американски астронаути на Месечината, за прв пат по речиси 50 години.
По враќањето на Земјата, ќе следи Артемида II, првиот вселенски лет на Орион со екипаж.
Слетувањето на Месечината ќе биде врв на мисиите Артемида.
Првично планиран за 2024 година, овој исклучително важен настан треба да се случи најрано во 2025 година.
Мисијата ќе однесе четворица астронаути во орбитата на Месечината во вселенското летало Орион, каде двајца од нив, барем една жена, ќе се префрлат во вселенското летало SpaceX за последното приближување до Месечината.
САД испратија 12 астронаути на Месечината помеѓу 1969 и 1972 година.
