Германскиот канцелар Олаф Шолц пред пратениците изјави дека надзорот на границата со некои соседни земји ќе продолжи уште долго време. Германија моментално ги контролира границите со Полска, Чешка, Швајцарија и Австрија. Шолц најави и можност за воведување посебни платежни картички за барателите на азил, на кои ќе добијат дел од државната помош. Со тоа би се спречило испраќање пари во татковината.
Контролата на границата со Полска, Чешка, Швајцарија и Австрија ќе продолжи уште долго, изјави германскиот канцелар Олаф Шолц во Бундестагот. Тој објасни дека владата добила поддршка од сојузните држави за воспоставување на сеопфатни мерки за контрола на границите во блиска иднина и долго време. Притоа тие ќе соработуваат со соседните земји, додаде тој.
Во вторникот, Германија го продолжи граничниот надзор со Полска, Чешка и Швајцарија за 20 дена. „Нашиот пакет стационарни и мобилни мерки на граничната полиција е важен за спречување на илегалната миграција во Германија“, изјави тогаш германската министерка за внатрешни работи Ненси Фезер.
Шолц оцени и дека наскоро би можеле да воведат платежни картички за барателите на азил, кои би можеле да се користат во Германија. На почетокот на месецот, Шолц разговараше за овој концепт со лидерите на сојузните држави, кои изразија желба да воведат картички.
Во иднина, барателите на азил ќе добиваат барем дел од помошта што им следува како кредит на нивната платежна картичка. Ова би требало да спречи трансфер на пари во земјата на потекло, пренесува германската прес-агенција dpa.
Контролата на границата со Австрија Германија ја воведе летото 2015 година поради големиот број бегалци. На границата со Полска, Чешка и Швајцарија беше воведена на 16 октомври. Таа како причина ја наведе борбата против илегалната имиграција и шверцот на луѓе.
Според податоците на МВР во Берлин, германската полиција на границата со Полска, Чешка и Швајцарија од воведувањето на надзорот евидентирала околу 6.900 нелегални влегувања во земјата и привела околу 90 шверцери.
