Поранешната австралиска тенисерка Јелена Докиќ ги осуди навредливите коментари на социјалните мрежи за нејзиниот физички изглед. Докиќ, која прави телевизиски интервјуа со играчите по натпреварите на Австралија опен, напиша на Инстаграм дека навредливи коментари за нејзиното тело доаѓаат од целиот свет, особено од Србија.
„И да, многу од овие луѓе се жени. Толку од жените кои ги поддржуваат жените“, напиша Докиќ (39).
Според поранешниот тенисер број четири во светот, роден во Хрватска, чиј татко е Србин, тие коментари се „штетни и одвратни“.
Докиќ претходно изјави дека нејзиниот татко Дамир со години ја малтретирал, таа јавно проговори за нејзината психичка состојба и призна дека минатата година била блиску до самоубиство.
„Најчест коментар е – што и се случило, зошто е толку дебела. Ќе ви кажам што се случи – наоѓам начин да преживеам и да се борам… И навистина не е важно што правам и што се случило, бидејќи „големината“ не треба да биде важна“, напиша Докиќ.
Она што е важно, како што истакна таа, е „злоупотреба на мрежите, малтретирање и понижување на дебелите луѓе“.
„Тоа е важно, бидејќи тие што го прават тоа се само зли, лоши, гнасни и неуки луѓе. Можам и ќе бидам во форма за себе и моето здравје, но вие нема да станете подобри луѓе. Тежината ќе се промени, но злите луѓе ќе останат зли“, истакна таа.
Јелена Докиќ, која освои шест титули во кариерата и стигна до полуфиналето на Вимблдон во 2000 година, се прослави на 16 години кога во 1999 година во првото коло на Вимблдон ја победи тогашната тенисерка број еден во светот Мартина Хигинс.
