Внуката на Јосип Броз Тито објави фотографија со родителите. Нејзиниот татко, Александар Мишо Броз, најмладиот син на Тито, веќе има 82 години.
Александар Мишо Броз, син на Јосип Броз Тито, по завршувањето на дипломатската кариера ретко се појавуваше во јавноста во последната деценија. Неговата ќерка Саша Броз, внуката на Тито, неодамна објави фотографија на која и се придружија 82-годишниот татко Мишо и 81-годишната мајка Мира.
Под фотографијата од ресторанот напишала – „двајцата се се“ – и додала дека е горда на семејството и благодарна за тоа.
Пред извесно време, 54-годишната театарска режисерка за хрватскиот магазин Глорија изјави дека нејзините родители имале најголемо влијание врз тоа како таа се обликувала како личност. „Човек мора да знае како да се менаџира низ годините, но семејството е секогаш тука за да ви го чува грбот“, рече таа.
Александар Мишо Броз е роден во бракот на Тито со неговата втора сопруга Херта Хас од Марибор. Како и неговиот татко, и тој самиот се испроба во политиката, но и во економијата. Во 1980-тите и 1990-тите тој ги извршуваше највисоките позиции во енергетската компанија ИНА. По осамостојувањето на Хрватска, по препорака на тогашниот претседател Фрањо Туѓман, станал прв советник на хрватскиот министер за надворешни работи. Потоа работел како ополномоштен министер во хрватските амбасади во Русија и Египет и како хрватски амбасадор во Индонезија.
