Израелските сили незаконски убиваат Палестинци без страв од владините реперкусии, се вели во новиот извештај на Хјуман рајтс воч (ХРВ).
Извештајот, заснован на истражување за убиствата на осум Палестинци помеѓу јули 2022 и октомври 2023 година, покажа дека израелските сили или „погрешно фатално пукале или намерно ги егзекутирале“ поединците, и покрај тоа што не претставуваат закана за безбедноста.
Во еден случај, се вели во извештајот, маж во Џенин бил повеќепати застрелан од израелските сили додека ранет ползел по земја. Во друг случај, израелските сили убиле 15-годишник во Тулкарем, за да пукаат во неговиот татко неколку минути подоцна додека се обидувал да го земе телото на својот син. Според снимката што ја прегледа ХРВ, се чини дека ниту таткото ниту синот се вооружени.
„Овие убиства се случуваат на ниво без неодамнешен преседан, во средина каде што израелските сили немаат потреба да се плашат дека нивната влада ќе ги повика на одговорност. Попустливата и дискриминаторна употреба на сила од страна на израелската влада и ендемската неказнивост се еден аспект од апартхејдот и структурното насилство со кои се соочуваат Палестинците секој ден“, рече Ричард Веир, висок истражувач во меѓународната група за човекови права, пренесува Ал Џезира.
„Незаконските убиства на Западниот Брег ќе продолжат се додека продолжува системската репресија на израелските власти врз Палестинците“, додаде Веир.
