Израелскиот министер за одбрана Јоав Галант изјави дека армијата планира да ги засили нападите врз цели на Хезболах во Либан.
„Многу силно го погодивме Хезболах во изминатата година, а особено во изминатите недели, ќе продолжиме да ги интензивираме тие напори“, рече Галант за време на посетата на израелскиот град Сафед на север.
Израелската армија (ИДФ) објави дека по првиот бран напади погодила повеќе цели, вклучително и фрлач што го користеше либанскиот екстремистички Хезболах за да истрела ракети кон северниот град Тиберија утринава, пренесоа агенциите.
ИД соопшти дека борбените авиони погодиле фрлачи кои биле користени за истрелување ракети од областа Хадат во Либан и уште десетици фрлачи, складишта за оружје и терористичка инфраструктура во областа Сидон, Набатие и на други места, додавајќи дека нападите продолжуваат.
Израелските воздушни напади се интензивираа во понеделникот и тоа беше најсмртоносниот ден во Либан во повеќе од две децении. Повеќе од 500 луѓе загинаа, вклучувајќи жени и деца, а околу 1.800 беа ранети.
