Израелскиот и палестинскиот амбасадор во ОН меѓусебно се обвинија на состанокот на Советот за безбедност, кој беше свикан итно поради контроверзната посета на израелскиот министер на светото место во источен Ерусалим каде се наоѓа џамијата Ал Акса.
Израелскиот амбасадор Гилад Ердан седницата ја нарече „патетична и апсурдна“, а палестинскиот пратеник Ријад Мансур ја обвини еврејската држава дека покажува „апсолутен презир“ кон меѓународната заедница и побара од ОН да преземат акција.
Петнаесет членки на Советот за безбедност разговараа за посетата, која предизвика гнев кај Палестинците, во седиштето на ОН во Њујорк, а беше одржана на барање на Обединетите Арапски Емирати и Кина.
Пред почетокот на седницата, претставникот на Израел во светската организација, Ердан, им изјави на новинарите дека „нема апсолутно никаква причина“ таа да се одржи.
Посетата на новиот израелски министер за национална безбедност, екстремно десничарскиот Итамар Бен-Гвир, во вторникот наиде на меѓународна осуда, вклучително и критики од САД, долгогодишниот сојузник на Израел.
Ал Акса се наоѓа во анектираниот Источен Ерусалим и е третото најсвето место во исламот.
Тоа е најсветото место за Евреите и светилиштето го нарекуваат Рид на храмот, бидејќи таму порано се наоѓале древни еврејски храмови.
Според долгогодишниот статус кво, немуслиманите можат да го посетат светото место во одредени периоди, но не им е дозволено да се молат таму, иако се верува дека некои израелски националисти го прават тоа, што ги налути Палестинците.
Ердан оцени дека посетата на Бен-Гвир, лидерот на партијата Еврејска моќ, е „во согласност со статус кво“ и рече дека „кој го тврди спротивното само ја разгорува ситуацијата“.
„Да се тврди дека оваа кратка и целосно легитимна посета требаше да доведе до итна седница на Советот за безбедност е патетично“, додаде израелскиот амбасадор.
Западните земји предупредија дека таквите потези го загрозуваат инаку „чувствителниот“ договор за светите места во Ерусалим.
Кои црвени линии би требало да ги помине Израел за Советот за безбедност конечно да каже „доста е“ и да постапи соодветно?“, праша палестинскиот амбасадор во ОН.
Американскиот дипломат Роберт Вуд на седницата рече дека САД се против „секакви еднострани дејствија што отстапуваат од историската статус кво, што е неприфатливо“.
„Апелираме и до Израелците и до Палестинците да ги преземат неопходните чекори за враќање на мирот, спречување на понатамошно крвопролевање и зачувување на можноста за решение со две држави за мир на Блискиот Исток“, рече Вуд.
Советот за безбедност на ОН усвои неколку резолуции за израелско-палестинскиот конфликт во текот на годините и го поддржува решението со две држави за мир на Блискиот Исток.
На крајот од двочасовната седница, Мансур го изрази своето задоволство „поради едногласноста (на Советот) во одбраната на статус квото“, и додаде дека не очекува натамошна конкретна акција од светската организација.
