Петмина Палестинци загинаа денеска во израелски воздушни напади на окупираниот Западен Брег, соопшти палестинската Црвена полумесечина. Израелската армија тврди дека погодила терористичка ќелија, јавуваат странските новински агенции.
Според Црвената полумесечина, израелската армија извршила напади со беспилотни летала во близина на џамија во градот Тубас на северниот дел на Западниот Брег. За нападите во Тамун известуваат и очевидци на кои се повикува француската новинска агенција АФП.
Во меѓувреме, израелската војска објави дека нејзините сили моментално спроведуваат антитерористички операции во областа Тубас и Тамун и дека еден нејзин авион погодил вооружена терористичка ќелија за време на операција во Тубас.
Кон крајот на август, Израел започна голема офанзива на северниот дел на Западниот Брег, вклучувајќи ја областа Тубас. Во израелски воздушен напад врз автомобил во Тубас минатата недела загинаа пет лица, според медицински извори. Израелската армија тогаш објави дека извршила три насочени напади против вооружени терористи и дека меѓу убиените е „важен терорист од Џенин“ Мухамад Закарија Зубеиди.
Израел го окупира Западниот Брег од 1967 година, а откако палестинското исламистичко движење Хамас ја започна војната во Газа на 7 октомври минатата година со напад врз Израел, ги интензивираше нападите на територијата.
Според палестинското Министерство за здравство, во овој период на Западниот Брег биле убиени околу 700 Палестинци, а израелските власти наведуваат дека најмалку 23 Израелци, вклучително и војници, биле убиени во палестинските напади на територијата во овој период.
