Израел не планира да се повлече од новоокупираните сириски територии
Израелскиот министер за одбрана Израел Кат посочи дека немаат намера наскоро да ја повлечат армијата од сириските области што ги окупираа по промената на власта во Дамаск. Министерот Кач смета дека од клучно значење за безбедноста на Израел е да се задржи присуството во тампон зоната за демаркација, која е контролирана од мировните сили на Обединетите нации во последните 50 години.
Во неделата, само неколку часа по падот на владата на Башар ал Асад и преземањето на власта од страна на неколку бунтовнички групи предводени од исламисти, Израел влезе во тампон зоната што ги дели израелските и сириските позиции, прекршувајќи го договорот за прекин на огнот од 1974 година.
Споменатата област, која е контролирана од силите на ОН, ја разграничува Сирија и нејзините територии на Голанската висорамнина, која Израел ја окупираше од војната во 1967 година. Поголемиот дел од Голанската висорамнина исто така беше еднострано припоен од Израел.
Копнената инвазија, при која израелските сили го освоија и врвот на планината Хермон, на само околу 40 километри од главниот град Дамаск, беше проследена со големи повеќедневни напади, со кои Израел ги уништува остатоците од опремата на поразената сириска армија низ целата земја.
Во денешната изјава Израел Кач напиша дека одржувањето присуство на врвот на планинскиот венец е клучно за безбедноста на Израел. „Мора да се направи сè за да се обезбеди подготвеност на лице место за да можат војниците да останат таму и покрај предизвикувачките временски услови“, додаде тој, пренесе француската новинска агенција АФП.Планината Хермон на границата меѓу Сирија и Либан се наоѓа на надморска височина од 2.814 метри и во зима е покриена со снег.
Денеска на мрежата X, Кач објави и фотографија од себе и премиерот Бенјамин Нетанјаху за време на посетата на Голанската висорамнина, а во исто време ја поздрави повторното окупирање на врвот на планините по 51 година како „возбудлива историска настан“, јави катарската телевизија Ал Џезира.
Нетанјаху во четвртокот увери дека распоредувањето на израелските сили, кое беше отворено критикувано од Обединетите нации, е само привремено.
