Сувите зимски денови кои траат веќе со недели предизвикаа загриженоста дека Италија е изложена на ризик од нова суша по алармантната состојба од минатото лето, научниците и еколошките здруженија велат дека главната причина е што Алпите добиле помалку од половина од нормалното количество снег.
Венеција, каде што поплавите се голем проблем, се справува со невообичаено ниска плима што ги спречува гондолите, водените такси и амбулантите да пловат по каналите, пишува Гардијан.
За проблемите во Венеција се посочува комбинација од фактори, вклучувајќи недостаток на дожд, висок воздушен притисок, полна месечина и океански струи. Еколошката група Легамбиенте во понеделникот соопшти дека реките и езерата во Италија страдаат од сериозен недостиг на вода, а северните региони на земјата се особено загрозени.
– Најдолгата италијанска река По, која тече од Алпите на северозапад сè до Јадранот, во овој период од годината има 61 отсто помалку вода од вообичаеното – се вели во соопштението.
Минатиот јули, Италија ја претрпе најголемата суша во последните 70 години и прогласи вонредна состојба во областите околу реката По, кои сочинуваат околу една третина од земјоделското производство во земјата.
– Вододефицитната состојба започна во зимата 2020/2021 година, па оттогаш проблемот расте. Ни требаат 50 дена дожд за да ги надоместиме загубените 500 мм во северозападните региони – изјави експертот за клима Масимилијано Паски од италијанскиот научно-истражувачки институт „CNR“.
Нивото на водата на езерото Гарда во северна Италија падна на рекордно ниско ниво, што овозможува пеш да се стигне до малиот остров Сан Бјаџо. Антициклонот доминира во времето во Западна Европа веќе 15 дена и носи благи температури кои вообичаено се забележуваат кон крајот на пролетта. Најновите временски прогнози најавуваат доаѓање на многу потребните врнежи и снег на Алпите во наредните денови.
