Во писмо упатено до шефот на ОН, Антонио Гутереш и претседателката на Советот за безбедност, Ванеса Фрејзиер, Техеран нагласи дека неговиот напад врз Израел е правен и оправдан чин на самоодбрана од израелските „агресии“.
Иранската мисија во ОН го осуди неуспехот на Советот за безбедност да го осуди смртоносниот израелски воздушен напад врз конзулатот на земјата во Дамаск на 1 април.
„Како одговорна членка на Обединетите нации, Исламската Република Иран е посветена на целите и принципите содржани во Повелбата на Обединетите нации и меѓународното право и ја повторува својата доследна позиција дека не бара ескалација или конфликт во регионот“, пишува во писмото.
Сепак, Иран предупреди дека ќе го брани својот народ и интереси од секакви закани.
Нема извештаи за повредени луѓе директно од иранските напади, соопшти израелската служба за итни случаи, јави Си-Ен-Ен.
Сепак, службата за итни случаи Маген Давид Адом (MDA) соопшти дека била повикана да интервенира кај вкупно 31 лице кои претрпеле полесни повреди додека се движеле кон засолништа и кои претрпеле напади на паника за време на нападите со дронови и проектили.
Претходно, МДА соопшти дека однела седумгодишно девојче во болница, кое се здобило со тешка повреда на главата поради шрапнел од проектил пресретнувач што бил лансиран за пресретнување на иранска ракета.
Во Голанската висорамнина утрово се огласија сирени за тревога бидејќи Либан истрела околу 25 проектили, соопштија израелските одбранбени сили (ИДФ).
ИДФ соопштија дека сирените се огласиле во населбите Ортал и Шаал рано утрово. Тоа се случи откако Иран го нападна Израел со дронови, крстаречки и балистички ракети.
Не е наведен типот на испуканите проектили, ниту дали биле пресретнати.
Претходно бараж од најмалку 10 ракети беше истрелан од Либан кон Израел, изјави портпаролот на израелската војска за Си-Ен-Ен.
Според ИДФ, во петокот врз Израел беа истрелани околу 40 ракети од јужен Либан. Либанските милитанти на Хезболах, поддржани од Иран, рекоа дека ги испукале ракетите врз позициите на израелската артилерија како одговор на неодамнешните израелски напади и како поддршка на палестинскиот народ во Газа.
