Шефот на иранската револуционерна гарда, Хусеин Салами, во својот говор во петокот, го опиша налогот за апсење на израелскиот премиер и на поранешниот министер за одбрана, издаден од Меѓународниот кривичен суд, како „крај и политичка смрт“ на Израел, објави Араб њуз.
– Ова значи крај и политичка смрт на ционистичкиот режим, режим кој денес живее во апсолутна политичка изолација од светот и неговите службеници повеќе не можат да патуваат во други земји – рече Салами во говорот емитуван на државната телевизија.
Во првата официјална реакција на Иран, Салами го нарече налогот на Меѓународниот кривичен суд (МКС) „потег за добредојде“ и го толкуваше неговото значење како „голема победа за палестинските и за либанските движења на отпорот“.
Израел и неговите сојузници ја критикуваа одлуката на МКС да издаде налог за апсење на израелскиот премиер, Бенјамин Нетанјаху, и на поранешниот министер за одбрана на земјата, Јоав Галант. Судот издаде и налог за апсење на воениот началник на Хамас, Мохамед Деиф.
Потерниците против Нетанјаху и Галант беа издадени како одговор на обвинувањата за злосторства против човештвото и за воени злосторства за време на израелската војна против Хамас во Појасот Газа, предизвикани од нападот на палестинската милитантна група врз Израел на 7 октомври 2023 година.
Овој потег наиде на гневни реакции од страна на Нетанјаху, кој го осуди како антисемитски, како и од најблиските сојузници на Израел, вклучително и САД, но беше поздравен од групите за човекови права, меѓу кои и од Амнести интернешенел.
Потегот на МКС теоретски го ограничува движењето на Нетанјаху бидејќи кој било од 124-те национални членови на судот ќе биде обврзан да го уапси на своја територија.
Главниот обвинител на судот, Карим Кан, ги повика членовите на телото да постапат според налозите, а оние кои не се членови, да работат заедно на „почитување на меѓународното право“.
