Имунологот Милош Марковиќ од Институтот за микробиологија и имунологија на Медицинскиот факултет во Белград посочи дека бројот на заболени од грип во Србија е зголемен и препорача вакцинација.
„Со оглед на тоа дека најдобрата превенција од грип е вакцинацијата и со оглед на фактот дека повеќето луѓе развиваат нивоа на заштитни антитела во рок од две до четири недели од примањето на вакцината против грип, сепак има смисла луѓето да се вакцинираат, особено поради можното влошување на епидемиолошката состојба во Србија поради враќањето на децата на училиште по зимскиот распуст“, рече Марковиќ.
Оваа препорака првенствено се однесува на оние луѓе кои се изложени на зголемен ризик да развијат потешка форма на болеста и компликации доколку заболат од грип, како што се постари лица (над 65 години), хронични пациенти со срцеви, белодробни и други заболувања, дијабетичари, лица со ослабен имунитет и многу други.
Бидејќи и оние луѓе кои не спаѓаат во овие ризични категории може да развијат тешка клиничка слика и компликации во случај на болест, препораката на Марковиќ е сите да се вакцинираат.
Тој посочи дека над 50 отсто од сите хоспитализации во Австралија биле за деца помлади од 16 години и дека само оваа сезона во Америка од грип починале 85 деца, од кои многу немале придружни болести.
Сезоната на грип се уште трае и не е доцна сите луѓе, вклучително и децата, да се вакцинираат“, рече Марковиќ.
Вакцинацијата против грип за ризичните категории на население е покриена со Националната програма за имунизација. За населението кое не е опфатено со таа програма, вакцината против грип е достапна во аптеките или може да се прими во приватни медицински установи.
