Технолошкиот претприемач Илон Маск слета во Тел Авив во понеделникот, објави воздухопловниот експерт, а за време на посетата се очекува дека израелското раководство ќе се обиде да го сврти вниманието на милијардерот кон растот на антисемитизмот на Интернет и прашањето за заложниците во разурната од војна Газа.
Кабинетот на израелскиот претседател Исак Херцог во неделата објави дека со него ќе се сретне Илон Маск, а израелските медиуми јавуваат дека сопственикот на Tesla и SpaceX ќе се сретне и со премиерот Бенјамин Нетанјаху.
Ави Шарф, експерт за воздухопловство од израелскиот весник Хаарец, на медиумската платформа на Маск Х, порано Твитер, објави дека авионот со милијардерот слетал на израелска територија во понеделник наутро.
Нетанјаху се состана со Маск во Калифорнија на 18 септември и го повика да најде рамнотежа помеѓу слободата на изразување и борбата против говорот на омраза, по неколкунеделни контроверзии околу антисемитската содржина на Х.
Маск потоа одговори дека се противи на антисемитизмот и на сето она што „промовира омраза и конфликти“ и ги повтори претходните изјави дека Х нема да поддржува говор на омраза.
Антисемитизмот и исламофобијата се во пораст низ светот, влошени со седумнеделниот конфликт меѓу Израел и Хамас.
Двете страни моментално се под прекин на огнот што му овозможи на Израел да врати некои од околу 240-те заложници што милитантното движење ги зеде во Појасот Газа по нападот на 7 октомври. Израел пак ги ослободува Палестинците приведени од безбедносни причини.
