Не е забележано зголемување на нивото на радијација во нуклеарната централа Запорожје по неодамнешното гранатирање, соопштија во неделата властите во Киев и Москва, кои според нив ја погодиле салата за поправка на хеликоптери на украинското воздухопловство со „екстремна прецизност“.
Нивото на радијација останува нормално, соопшти руското Министерство за одбрана, повторувајќи слични информации претходно дадени од украинскиот државен нуклеарен оператор Енерхоатом.
Со недели, двете страни меѓусебно се обвинуваат за тоа кој го гранатирал огромниот нуклеарен комплекс, што ги зголеми меѓународните стравувања за потенцијална катастрофа во најголемата европска нуклеарна централа.
Москва во неделата објави дека вчера биле извршени уште два артилериски напади. Едната граната ја погоди областа во близина на реакторот број шест, а другата ја погоди пумпната станица која обезбедува ладење.
Одделните тврдења на Киев и Москва не можеа да бидат независно проверени.
Откако нуклеарната централа беше привремено исклучена од украинската електроенергетска мрежа во четвртокот, на што му претходеше итно исклучување на сите реактори, Енерхоатом објави дека два блока се повторно вклучени.
Во меѓувреме, руската армија ја потврди веста за нападот на градот Запорожје, кој се наоѓа од другата страна на реката Днепар, во кој е употребено „исклучително прецизно оружје“.
Погодена е салата во која се поправаа хеликоптери на украинските воздухопловни сили, соопшти Министерството.
Во исто време, украинскиот градоначалник на градот Мелитопол, кој е под руска окупација, на Телеграм напиша дека во тој југоисточен град е уништена руска воена база.
