Лидерот на ВМРО-ДПМНЕ Христијан Мицкоски порача дека ќе се повлече од политиката доколку само еден пратеник од неговата партија ја изневери неговата доверба и гласа за уставни измени.
– Тоа го кажав и пред нецела година и стојам зад тоа. Ќе го слушнете Димитар Ковачевски дека јас сум се борел за фотелја. А јас кажувам дека ако само еден пратеник ме изневери дека заминувам од политиката. Па кој тогаш кој се бори за фотелја, а јас ќе бидам попрецизен, за тендерите. Нема некој кој што повеќе од него се бори за фотелја – рече Мицкоски вчера во Кичево, по повод 33-години од формирањето на партијата и по повод формирањето на општинскиот комитет.
Тој рече дека паднале во вода најавите дека оваа влада има двотретинска поддршка за уставните измени, и покрај притисоците.
– И еве, дојде денот, 18 август, кога нашите 44 пратеници рекоа „не“ за бугарскиот диктат, „да“ за Македонија. И не беше лесно, зашто ние не се бориме само против оваа Влада на ДУИ и малите и бедни измеќарчиња од СДСМ, туку се бориме против многу помоќни, денеска во 21 век, кога се поставува прашањето за постоењето на македонскиот народ, бидејќи некој се труди да го избрише нашето постоење – рече Мицкоски.
