Во знак на жалост, знамињата се поставени на половина копје во Фројденберг, село на околу 80 километри источно од Келн. Безживотно тело на 12-годишното девојче беше пронајдено во неделата во шумска област во близина, а подоцна се потврди дека станува збор за насилна смрт. За убиството се осомничени две девојчиња на возраст од 12 и 13 години, пишуваат локалните медиуми.
Девојчето последен пат било видено во саботата при посета на пријател. Се упатило кон својот дом во саботата околу 17.30 часот по локално време. Најкраткиот пат помеѓу куќата на пријателот и домот на девојчето бил низ шумска област. Откако не успеало да стигне дома, родителите ја алармирале полицијата. Пожарникари, полицајци и кучиња трагачи започнаа голема потрага во областа каде што девојчето – идентификувано од локалните медиуми како Луиз – најверојатно прошетало во саботата навечер. Телото било пронајдено во близина на велосипедска патека на границата меѓу покраините Рајнска област Пфалц и Северна Рајна-Вестфалија.
Засега не се познати мотивите на двете девојчиња да ја убијат својата врсничка, ниту начинот на кој тоа го сториле. Се очекува наскоро полицијата во Кобленц да објави детали од истрагата.
