Холандија се приклучува на воената коалиција со сојузниците, вклучително и Велика Британија, која ќе ја снабдува Украина со напредна технологија за беспилотни летала и ќе ги зајакне нејзините офанзивни способности во војната против Русија, изјави холандскиот министер за одбрана, пренесе Ројтерс.
Ветувањето на Холандија доаѓа како додаток на борбените авиони Ф-16, артилерија, муниција и системи за противвоздушна одбрана кои земјата веќе му ги достави на Киев.
За Холандија, може да има дополнителни трошоци над веќе предвидените 2 милијарди евра за 2024 година, изјави министерката за одбрана Касја Олонгрен во интервју за Ројтерс во пресрет на дводневните состаноци на министрите за одбрана на НАТО во Брисел што почнуваат денеска.
„Секако дека знаеме дека беспилотните летала се многу важни во оваа војна. Затоа и се придружуваме на коалицијата што Украина ја започна заедно со Летонија, заедно со другите земји, за да се увериме дека го правиме токму тоа – зголемување на производството, користење на најнова технологија за да го обезбедиме токму она што и треба на Украина“, рече таа.
Министерството за одбрана на Украина го најави учеството на ОК минатиот месец.
Според Ројтерс, беспилотните летала станаа клучен дел од воената стратегија на Украина и Русија за извидување и таргетирање, во голема мера благодарение на нивната релативно ниска цена.
Двете страни сега користат илјадници мали, ефтини беспилотни летала за надзор и напад, додека ја зголемуваат својата флота од поголеми беспилотни летала со подолг дострел кои можат да летаат многу подалеку и да носат потешки камери или повеќе експлозиви.
И Велика Британија и Холандија веќе и помогнаа на Украина да ја изгради својата флота со беспилотни летала.
„Она што е ново е што сега ја формираме оваа коалиција. Значи, ние ги поврзуваме, да речеме, работите што ги правиме одделно во една коалиција која ќе може да одговори на новите барања на Украина врз основа на тоа како тие гледаат на битката што се одвива на линијата на фронтот. И мислам дека тоа е силата на оваа коалиција“, рече Олонгрен.
Украина има за цел да произведе илјадници беспилотни летала со долг дострел, способни да напаѓаат длабоко во Русија до 2024 година и веќе има до 10 компании кои работат на производство, изјави во понеделникот во интервју за Ројтерс министерот за дигитална технологија на Украина, Михаил Федоров.
