Хамас го погоди централниот дел на Израел со низа ракети додека Израел ја одбележува една година од нападите на 7 октомври. Лекарите рекоа дека две жени на возраст од 30 години биле лесно ранети од шрапнели и пренесени во болницата Асаф Харофех, која се наоѓа на околу 9 милји југоисточно од Тел Авив, пренесува Дејли Телеграф.
Израелските одбранбени сили ИДФ соопштија дека ракетите биле лансирани од градот Кан Јунис во Газа.
Воздухопловни тревоги беа објавени во некои области на Тел Авив, како и во Холон, Ришон Лезион, Бат Јам и други централни градови. Претходно, Хамас истрела ракети од Газа врз израелските погранични заедници додека тие почнаа со комеморациите по повод првата годишнина од нападите на 7 октомври врз јужен Израел.
ИДФ објавија дека го спречиле планот на Хамас да истрела многу поголем бараж, велејќи дека нивните борбени авиони погодиле ракетни фрлачи и тунели низ Газа од каде што терористичката група планирала да го иницира нападот.
