Најдобриот светски тенисер Новак Ѓоковиќ освои сѐ што може да се освои, но олимпиското злато остана недостижен сон.
Неодамна Ѓоковиќ ја прекина соработката со својот тренерГоран Иванишевиќ, што многумина ги загрижи, но Хрватот испрати охрабрувачка порака.
Тенискиот стручњак во ексклузивно интервју за „Спортклуб“ изјави дека Ѓоковиќ ќе го најде вистинскиот пат по слабиот старт на сезоната и му посака да ја постигне најголемата цел во кариерата.
– Не само што верувам дека ќе се мотивира, туку сум и сигурен сум во тоа. Од се срце му посакувам да го освои олимпиското злато, пред сите Грен слемови- тоа е нешто што го сака и чувствува дека го должи. Никому ништо не должи, но ајде… Сакам да успее во тоа – рече Иванишевиќ.
Поранешниот шампион на Вимблдон беше тренер на Новак Ѓоковиќ во изминатите шест години, период кога српскиот тенисер ги достигна најголемите успеси во кариерата и стана најуспешниот тенисер во историјата со освоени рекордни 24 грен-слем титули. По прекинувањето на соработката со Иванишевиќ, во подготовките за сезоната на земјена подлога Ѓоковиќ тренира под водство на поранешниот српски тенисер Ненад Зимоњиќ.
