Новак Ѓоковиќ изјави денеска дека не се смета себеси за фаворит пред почетокот на грен-слем турнирот на Ролан Гарос. Најдобриот светски тенисер утре ја почнува одбраната на титулата на парискиот грен-слем против Французинот Пјер-Иг Хербер.
Ѓоковиќ, кој е рекордер со 24 освоени грен слем титули, вчера загуби од Чехот Томаш Махач со 4:6, 6:0, 1:6 во полуфиналето на турнирот во Женева.
Првиот светски рекет во Париз пристигнува без ниту еден трофеј од почетокот на годината и не е преголем оптимист за успешен настап на Отвореното првенство на Франција.
– Секако дека сум загрижен … Воопшто не играм добро оваа година – изјави Ѓоковиќ.
Одговарајќи на новинарско прашање околу шансите за одбрана на титулата на Ролан Гарос, Ѓоковиќ истакна дека не се гледа себе си меѓу фаворитите.
– Не се сметам себеси за фаворит таму. Имам многу да работам. Ќе одам натпревар по натпревар и ќе видам до каде можам да стигнам. Само се надевам дека ќе бидам здрав и добро подготвен за Ролан Гарос – рече српскиот тенисер.
